18/5/17

Avelino González e Carlos Casares




Avelino González é  actor, tradutor,  humorista ,narrador oral. 

Con motivo das celebración das Letras Galegas, contamos coa súa visita no mes de maio. O martes 16 contou para os de 3º e 4º ESO e o xoves 19 para os de 1º e 2º ESO.

En ambas sesións,  Avelino contou, en clave de humor,  parte da vida de Casares, esa que non está escrita nos libros nin na súa biografía literaria. Nunha hora de duración, aproximadamente, contou feitos, sucesos  e anécdotas vividas e escoitadas por Casares, focalizándoas dentro das súas obras e narrándoo de forma moi amena e  divertida.  Deunos a coñecer ese Casares persoa, humano,  que facía trasnadas de mozo, que namoraba, que se divertía cos amigos, que xogaba, que tiña vicios, que escoitaba á xente... amosando como, ademais de un gran escritor, era un referente na cultura,nas novas tecnoloxías e que, ao mesmo tempo, facía entenderse por calquera.

En ambas contadas, ademais de introducir as anécdotas de Casares, fíxolles entender ao alumnado, con ironía e humor, que os valores humanos son tan importantes como os académicos, Tocou temas transversais e valores tan importantes como a tolerancia, a igualdade entre sexos, os perigos das novas tecnoloxías, a xenofobia, a humildade, a importancia de ler... todos presentes nos libros de Casares e que Avelino soubo transmitirlle aos alumnos/as a través das súas palabras, xestos, e sentido do humor.

O resultado foi positivo, o alumnado quedouse con moitas desas anécdotas que el lles contou. Unha forma divertida, amena e diferente de coñecer ao homenaxeado das nosas Letras. Quedaron ganas de  ler os contos de Carlos Casares polo que o obxectivo principal, cumpriuse!

4/5/17

Ruta literaria Valle-Inclán



O martes 25 de abril o alumnado de 4º da ESO, organizada polo departamento de Lingua Castelá, realizou unha ruta literaria pola Pobra do Caramiñal e Vilanova de Arousa, percorrendo distintos lugares importantes na vida e obra de don Ramón María del Valle-Inclán. En cada parada o alumnado leu distintos fragmentos da obra valleinclanesca.

A ruta constou de dúas partes. Na primeira, pola mañá, consistiu nunha visita guiada polo profesorado onde todo o alumnado foi facendo as seguintes paradas pola vila da Pobra:

- recén chegados paramos no Porto onde puidemos contemplar a beleza da Ría de Arousa, onde lemos un fragmento de "Romance de lobos"; 

-despois diríximos a Torre Bermúdez, actual Museo Valle Inclán, onde antes de entrar limos varios poemas ao carón da escultura de Valle-Inclán: algúns almnos leron o poema que Rubén Darío lle dedica a Valle, e por outra banda o exprofesor Jose Luis, quen nos acompañou na ruta, recitou o poema que Antonio Machado lle escribiu, antes de acceder ao museo leuse o poema "Vitrales";


1/5/17

Exposición: Mapas/Cartografía

Seguimos a traballar o lema da biblioteca deste ano, polo que dende os departamentos de Ciencias Sociais e Matemáticas, conxuntamente coa biblioteca faremos ao longo do mes de maio unha exposición nos corredores do instituto na que faremos un percorridos pola historia da cartografía, cunha sección especial para Galicia e a nosa contorna.


27/4/17

Concurso de marcapáxinas


No mes de febreiro, coincidindo coa celebración dos 180 anos do nacemento de Rosalía de Castro, no departamento de Lingua Galega convocouse un concurso de marcapáxinas centrados na figura da escritora.

Os premiados foron os seguintes:

-1º prermio: Leimy Tatiana Duarte Holdin (1ºA)



-2º premio: Miguel Veloso Rodríguez-Gironés (1ºA)



-3º premio: Elena Canosa Collazo (2º A)


4/4/17

Tamén len... en marzo con Alba



 Pasados os fastos dos dez anos de vida do Tamén Len recuperamos neste mes de marzo as nosas lecturas mensuais coa visita da exalumna Alba Urceira, que tan unida estivo á Biblioteca Calixtina nos seus anos de estudante, e do que garda moi boas lembranzas.


Alba escolleu o libro de Reyes Monforte Besos de arena, do que nos leu o primeiro e o último capítulo, onde aparece o personaxe de Laia unha rapaza saharauí que vén estudar a España.




Recuperamos aquí unha cita que aparece nas páxinas finais da novela e que nos gustaron especialmente:

“El interior de la mirada de un antiguo amor es el océano donde se ahogan y naufragan todos los sueños”.

Moito amor transmitiu a lectura de Alba.


Despois da lectura Alba falounos da carreira que está a estudar, Educación Social, falándolle ao noso alumnado en que consisten estes estudos, que materias teñen, todas as posibles saídas laborais. 

Escoita aquí a súa lectura.

15/3/17

Visita da escritora Mª Sol Ortiz de Zárate


Hoxe visitounos a escritora Mª Sol Ortiz de Zárate, autora dos libros "La canción de Shao Li", leído polo alumnado de 1º da ESO, e de "Rebelión en Verne", leído en 2º da ESO. 

Sempre é unha gran experiencia poder compartir conversa cunha escritora. Múltiples foron as preguntas que lle formulou o noso alumnado que enriqueceu a lectura previa dos libros pola súa parte. En breve máis información do acto.

12/3/17

Unha aproximación á cultura colaborativa




Con motivo da celebración do Día Internacional da Muller, o departamento de orientación organiza unha charla taller na que as protagonistas son mulleres cunha traxectoria laboral que destaca pola innovación e o compromiso coa sociedade.



Este curso, o pasado luns 13 de marzo, o alumnado de 4º curso de ESO asistiu a unha charla-taller impartida por Chus Prol, quen na actualidade colabora nun proxecto propio, o espazo colaborativo Doutroxeito Coworking e quen afirma que ser autónoma é unha lección de vida ...e de supervivencia.

Chus, co-organiza a Galiza Maker Faire que dá a coñecer aos makers galegos que traballan no ámbito da robótica , a impresión 3D , artistas dixitais...


A charla consistiu na exposición das vantaxes da cultura colaborativa así como da súa traxectoria laboral, destacando a importancia da formación continua no mercado de traballo.



O taller centrouse no desenvolvemento de distintas dinámicas que puxeron de relevo como a través da cooperación podemos acadar  metas e obxectivos propostos, que doutro xeito se acadarían con moita dificultade o incluso a imposibilidade de acadalo de xeito individual.





7/3/17

Dez anos do Tamén Len no Faro de Vigo

O Faro de Vigo do 25 de febreiro de 2017 recolleu nas súas páxinas o dez anos de lecturas celebradas na Calixtina. Aquí vos deixamos o artigo.



21/2/17

Dez anos do Tamén Len

O 7 de febreiro de 2007 visitábanos Eduardo Diz Sestelo, músico profesional e ex-alumno do colexio Altamira, convidado polo departamento de Lingua castelá, a ler durante un recreo a aqueles alumnos/as, que de xeito voluntario, se animasen a asistir a súa lectura. O éxito foi tal que decidiuse invitar ao mes seguinte a outro ex-alumno, nese mes de marzo, a Darío Hermida. Logo viu Marcos Besada, daquela candidato á alcaldía do Concello. E así mes a mes, e ano a ano foi crecendo esta actividade na que convidábamos a xente do noso entorno a que viñeran a ler durante o tempo de recreo. A lectura sempre é seleccionada polos nosos invitados, sen ningún tipo de limitacións. Os minutos finais de cada sesión sempre son dedicados a conversar cos nosos invitados/as: das súas vidas, dos seus traballos, da súa época de estudantes... 

Ao longo destes anos a lista de invitadas e invitados foi ven heteroxénea, como podedes comprobar no tríptico que deseñamos para conmemorar os dez anos de existencia desta actividade. Políticos, enxeñeiros, artistas, potas, músicos, profesores, policías, camareiros, deportistas, farmacéuticas, administrativos, sacerdotes, actores, libreiras... pais e nais de alumnos/as, ex-alumnos/as, cativos das escolas do concello, alumnos/as franceses de intercambio no noso insituto... Citaremos, por destacar un, a David Amor, actor dunha serie da cadea televisiva Cuatro, que en xaneiro de 2016 conseguiu que practicamente todo o instituto asistise a súa sesión de lectura. Foi tal o éxito que ata tivemos que trasladarnos ao pavillón do instituto para dar acollida a todos eles.


Calculamos que ao longo destes dez anos máis de 3.000 alumnos/as asistiron a estas sesións de lecturas nas que setenta e sete invitados, até agora, pasaron polo noso centro educativo. Sen dúbida unha actividade de éxito absoluto no fomento da lectura organizada pola biblioteca do IES Pedras Rubias. E que esperemos siga co mesmo éxito moitos anos máis.

Neste mes de febreiro de 2017 cumprimos dez anos polo que decidimos facer unha celebración especial, convidando a varios invitados/as que xa pasaran pola nosa Calixtina con anterioridade a participar con nós desta actividade.

 De mestre de cerimonias exerceu o primeiro bibliotecario da Calixtina, José Luis, mestre xa xubilado que non dubidou en aceptar a invitación. Comezou lembrando os inicios desta actividade ante un salón de actos repleto de alumnado, que unha vez máis de xeito voluntario non dubidou en dedicar o seu tempo de recreo a gozar da lectura dos nosos invitados/as. Fixo un recordatorio para todos aquelas persoas que ao longo destes anos nos visitaron. Finalmente desexou longa vida para o noso “tamén len”.

Un tema musical ("Como te atreves" de Morat) interpretado por alumnado do noso instituto deu paso aos distintos invitados/as que ían sendo presentados por distintos rapaces, lembrando a data na que nos visitaran por primeira vez e a lectura que daquela seleccionaran.


Comezou Teresa Pérez, concelleira de Educación do concello, que escolleu un relato de Marilar Aleixandre titulado “Monólogo da vaca caníbal” pertencente a unha antoloxía de relatos de varios autores que leva por título Contos de máscaras, rúas, perdicións e caníbales. Impresións dunha vaca que nos mostrou un punto de vista orixinal.

Despois foi a quenda de Sara Hermida, enxeñeira, que leu un texto de total actualidade sobre o acoso escolar; seleccionou uns texto da bloguera Jenna Mosley. “Nunca te rendas, esa non é unha opción para ti”: mensaxe directo as conciencias do noso alumnado.


A terceira lectora invitada foi Rosa González, compoñente do grupo “Donicelas” que leu uns fragmentos de  A vida que nos mata de Xabier López López. Novela de trama policial que creou certa tensión no ambiente.

Por razóns persoais o acto viuse un pouca alterado xa que dous dos nosos convidados non puideron asistir
finalmente polo que tivemos que improvisar un cuarto lector. E aí tiñamos a Helier, profesor en prácticas de Educación Física no noso instituto, e que xa participara o curso pasado no “Tamén Len”, que non dubidou en participar no acto lendo un fragmento de Amor é unha palabra coma outra calquera de Francisco Castro, recentemente  nomeado novo director da editorial Galaxia. Lectura amorosa para un acto tan cheo de boas vibracións.

A despedida do acto foi de categoría: o noso querido bibliotecario José Luis deleitounos cun fragmento de  “Maese Pedro” de Miguel de Cervantes, pertencente ao capítulo XXVI da segunga parte de Don Quijote de la Mancha, que nos foi contando de memoria ante o asombro do noso alumado, pouco acostumado a vivir semellante experiencia.

A música do noso alumando puxo puxo punto final a unha nova sesión do Tamén Len, cunha versión de “Mi gran noche” de Raphael,  correspondente ao 15 de febreiro de 2017, dez anos despois daquela sesión inaugural.

Xa só nos resta desexar: Longa vida ao Tamén Len!!!


Podes escoitar as lecturas deste acto nos seguintes enlaces:

                                                             TERE     SARA      ROSA     HELIER     JOSE LUIS